هلا بكم.. إذا جلست فترة تبحث عن عمل أي عمل ما يهمك وش يكون وبعد فترة تلقاه لازم تبذل قصارى جهدك علشان تحافظ عليه وهذا اللي صار للشاب عبدالعزيز بعد ما لقاله ولد خاله الكبير عمل في جريدة ( الخبر ) وراح لرئيس التحرير وقابله ليستلم العمل.نترككم مع القصة:
رئيس التحرير: أنت عبدالعزيز اللي ولد خالك عبدالله؟
عبدالعزيز: نعم هو اللي كلمك عني وتوسط لي عندكم.
رئيس التحرير: اجل قلتلي وش يقرب لك عبدالله ؟
عبدالعزيز: رجل أمي وش فيك الله يهديك مو مركز معي ؟ اترك هالاوراق اللي معك ولد خالي.. عبدالله ولد خالي.
رئيس التحرير: اسمح لي بس عندي مقابلة مع الوزير وجالس اراجعها قبل ما ننزلها في عدد بكرة.
عبدالعزيز: إذا مشغول عادي أروح أدور شوي وارجع لك ماعندي شغل فاضي.
رئيس التحرير: لا خلك خلاص فضيت لك قلي ياعبدالعزيز عندك خبرة في الصحافة ؟ قد اشتغلت في مجال الصحافة ؟ولانشرت مقالات؟
عبدالعزيز:" والله الحمد لله عندي خبرة لابأس بها يعني .. بس وقت الصحافة المدرسية وصحيفة الحائط .
رئيس التحرير: ممتاز ممكن اعرف وش كان دورك فيها ؟ بالضبط يعني أنت رئيس التحرير أو تكتب مقالات أو تسوي مسابقات أو ايش؟
عبدالعزيز: لا مو لها الدرجة طال عمرك أنا بس كنت أعلقها على الجدار يعني الوكيل مستقصدني إذا ماحليت واجباتي يخليني أعلقها بس الحق حق.. كنت أقرا منها طشاطيش على الخفيف .
رئيس التحرير: اجل تعلقها .. ماعليه . طيب وش تحس انك موهوب فيه ؟ وش ودك تكون محرر في ايش؟ الرياضة أو الفن أو أمور الشباب والمجتمع ؟
عبدالعزيز : حطني في السياسة وماعليك إن شاء الله ماأخيب ظنك وان مافي لي مكان حطني بالاقتصادية إلى إن يفضى مكان .
رئيس التحرير:أقول نبي واحد يتابع أشياء غريبة ويأخذ رأي الناس فيها، مثلاً نبي نكتب مقال عن الحرية، ونبيك تروح بنفسك وتغطيه.
عبدالعزيز: لا شف طال عمرك حرية ومقاومة ومعارضة ومظاهرات من ألان ماأبيها توني في ريعان شبابي.
رئيس التحرير: وش ريعان شبابك وش تخربط أنت ؟ شارع الحرية اشهر شارع تفحيط في الرياض . وشلون ماتعرفة ؟ وش تعرف اجل ؟
عبدالعزيز : طيب أروح هناك وش أسوي ؟ اصفق لهم ولا وش بالضبط؟
رئيس التحرير: يا أخي أنت شاب وأبيك تندمج معاهم وتحاورهم ولا تبين لهم انك صحافي وبعدين تأخذ صور وبس. صعبة هالشغلة ؟ أبيك تعرف ليه هم يسوون كذا فهمت علي ؟
عبدالعزيز: يعني تبي تحقيق بس كذا ؟ من عيوني الثنتين ياخي ماطلبت شئ كبير ابشر بالتحقيق اللي يوسع صدرك . بس الله لايهينك هالشارع وينه فيه ؟
رئيس التحرير: شف تطلع من طريق الملك فهد بعد مخرج الثمامة ثم تسيد طوالي لين يصير السيدين سيد واحد بعدين بتجيك لفة على اليمين لاتدخل منها لان الشباب ياخذون ارتداد منها ، ادخل من اللفة الثانية ، زين؟ وتراهم يبدون الساعة 11 في الليل . وبكرة أبيك تجيب لي ريبورتاج معك مفهوم ؟
وطلع عبدالعزيز من مكتب رئيس التحرير وراح يستعد وانطلق لهم من الساعة العاشرة والنصف في الليل بالكراون فيكتوريا وهو متلطم ومسوي فيها ويقول لنفسه الحين لو جيت وصفطت معهم بيشكون فيني ويمكن مايعبروني ،، لازم أسوي شئ يخليني اندمج معاهم ، ووصل لين الشارع اللي قال عنه رئيس التحرير ، وطرت له فكرة ورجع للفة الاولى ودعس للموتر ودخل الشارع وبد يرمي الموتر يمين ويسار وتفحيط وشريط حسن بالونة على اعلى صوت والدرايش منزله كلها ، وشوي يسمع الشباب يقولون له عاش راعي الفيكتوريا ، واللي يقول ياراعي الفيكتوريا سلاسل سلاسل ، وهو مايعرف وش سلاسل بس واضح انهم مبسوطين ، وهو يرمي بالموتر يمين ويسار لييين خذاه الحماس ونسى نفسه وشوي ويشوف السيارات تتفرق والشباب اللي يشجعون بدو ينحاشون وهو مو معهم ، ويسمع واحد يقول ياراعي الفيكتوريا دوريات دوريات ، هو قال في نفسه : اللي مشاني بالسلاسل يمشيني بالدوريات " على باله انها حركة تفحيط " ورمى الموتر يمين ويسار وعلى هالحال لين شاف حوله اربع سيارات مرور ، ومحاصرينه وكلها ربع ساعة وهو في مركز الشرطة وكلها صف ساعة وجيه رئيس التحرير بنفسه عقب مااتصلوا عليه .
السبت فبراير 14, 2009 3:46 am